Монгол Улсын Ерөнхийлөгч Н.Энхбаяр Хууль зүй, Дотоод хэргийн дэд сайд С.Сүхбаатар, ХЗДХЯ-ны Гадаадын иргэн, харьяатын асуудал эрхлэх албаны дарга Д.Мөрөн нарыг хүлээн авч уулзаж, гадаадын иргэдийн шилжилт хөдөлгөөн, хөдөлмөр эрхлэлт, оршин суугаа нөхцөл байдлын талаар танилцаж, чиглэл өглөө.

Гадаадын иргэн, харьяатын асуудал эрхлэх албаны даргаар томилогдоод удаагүй байгаа Д.Мөрөн үүргийнхээ хүрээний үйл ажиллагааны одоогийн байдал, авч байгаа арга хэмжээнийхээ талаар танилцуулав.

Манай иргэдийн шүүмжилдэг гадаадын иргэдийн талаар хяналт, бүртгэлийн тогтолцоотой холбоотой дутагдлуудыг арилгаж энэ чиглэлээр ажилладаг бүх байгууллагуудын үйл ажиллагааг хооронд нь уялдуулан зохион байгуулах нэгдсэн сүлжээг бий болгож төгөлдөржүүлэх, авч байгаа арга хэмжээнийхээ үр нөлөөг дээшлүүлж идэвхжүүлэх, энэ талаар олон нийтэд тогтмол ил тод мэдээлж байх, гадаадын иргэдийн хууль ёсны эрх ашиг, сонирхлыг найдвартай хамгаалахын зэрэгцээ тэд манай улсын хууль тогтоомжийг зөрчихгүй байх талаар дорвитой өөрчлөлт гаргахыг Монгол Улсын Төрийн тэргүүн чиглэл болголоо.

Манай иргэдийн тухайд, хоёрдмол харьяалалтай байгаа казах иргэдийн асуудлыг ойрын хугацаанд цэгцлэх талаар арга хэмжээ авах, гадаадад амьдарч байгаа Монгол иргэдийн тоог бодитой гаргахыг Ерөнхийлөгч Н.Энхбаяр зөвлөв.